منتدى الشجرة

منتدى الشجرة

المفتاح الموقع الاعلاني الاول في السودان لمشاهدة الموقع على الرابط

 

http://almoftah.net

    كلام حبوبات سودانيات

    شاطر

    محمد احمد عبد الرحيم

    عدد الرسائل: 28
    نقاط: 5571
    تاريخ التسجيل: 17/04/2009

    كلام حبوبات سودانيات

    مُساهمة من طرف محمد احمد عبد الرحيم في الأربعاء يونيو 10, 2009 4:55 am

    تعال هنا ياولد.(تجيك ام كُلُعلُع) انشا الله... شوف بالله جنس الولد الممسوخ دا .(الله لا غزّا فيك بركةآ المطرطش آ المعولق)......

    طبعاً يا جماعة ....كلكم زمان ( أو لحدّى هسى) داعتكم حبّوبّاتكم جنس الدُعَا دا....
    الحبّوبّات وما أدراك ما الحبّوبَّات........ عالم قايم بى ذاتو...... رايكم شنو نقتحم جزء بسيط من عالم حبّوبّاتنا؟؟؟؟
    .....ابقوا داخلين......

    فى البدايه خلّونا نتكلم عن موضوع الدُعَا دا تحديداً...... بنلقى انو مافى حَبّوبَة مسالمة ومسكينة 100%...... بالتالى لمن تهيج لازم تفك آخِرا.... غايتو انا زمان لمن كنتا عايزة اسمع لى دُعَا جديد بدوِّر ليك حبوبتى جنس دوير واقوِّما ليك بى نمره اربعه ..... أها وتعال شوف.... راجمات من العيار التقيل....تداعيك لمن تحلف تقول الدعاء ده بيخسف بيك هسه دى......
    وكدى لو اخدنا مثال لو حبوبتك كوركت ليك و جيتا بعد مساافة....أها بعد تجيها تشبكك: انتا يا ولد اطرش؟؟؟؟؟ ( الطرش ال يقدِّد اضنيك ديل ان شا الله) اناديك من قبيل تجينى بعد ساعة ماشى تتقدَّل كَدِى تقول ماشيلَك فى شوك (تَمِش بطنك.. بركة الشيخ المكاشفى ).....
    أمِش الجيران ديل قول لى حَجّة السُّرَة حبوبتى قالتلِك نَمِش على ناس المناسبة ديل متين؟ واوعك يا ولد أكان فتحت لك الباب بِنَّيتَا القشة ام روح دى ام عويناتن سُغار متل قدود الجلد دى توريها الجايبك شنو.... باقى هى سأآآلة (يسألا نكير بركة الله والرسول) الخبَّارة الشمشَارة.....


    أها بعد تجى راجع وتديها الخبر انو حَجّة السُّرَة قالت انو المشى للعقد الساعه 4 ومُودِّيكم ولدا الدكتور بى عربيتوالجديدة....
    الدُعَا بقلب 180درجة ...... انتا يا يابا ان شا الله تتبارك وما تتشارك ... وتتعَّلا وما تتدَّلا....وأكان نافعنى يا يابا وبتترسَّل لى
    ان شا الله يعدلا عليك محل ما تقبِّل ... ويديك الفى مرادك.....
    وطبعا يا اخواننا فى الدُعَا السمح دا الحبوبات برضوا ما بقصَّرو تب .... واذا لحقن انبسطن منك و شكَّروك و دعن ليك دُعَا سمح على الايمان من كترت ما بتتكيف تقرب تركِّب ليك جناحين وتطير بيه...

    وبالمناسبة دى بنلقى انو الحبّوبّات وبى صِفَتِن شريحة مهمة من نساء السودان ... ليهن اعتقادات جازمة فى المشايخ والصوفية...... ونادراً ما نلقى لينا حبوبة ما (بتنده) ليها شيخ.... يا سيدى الحسن... يا الشيخ الجعلى..... يالشيخ الكباشى....................... الخ ..... اضف الى ذلك تعاملهم المباشر مع الفُقَرَا والأفكِيَا (جمع فكى) فى معظم امور الحياة تقريباً...

    وطبعا ًدا غير اعتقاداتهم الدينية فى حاجات كتيرة.... واديكم مثال بى حالة السفر..غايتو انا لو جيت مسافرانشاالله مدنى القرييبة دى... حبوبتى عندها طقوس خاصة جداً فى طريقة الوداع....اول حاجة بتملا يدها رمله وبتجرها وتواسيها بى صورة منتظمة فى ا*****... وبتقول لى اقلعي نعلاتك يا بت( وطبعاً يا بت دى... حتى لو عمرك 60 سنة برضو انتا لسه بت اولد) وقول بسم الله و امش فيها تلاتة خطوات بى كراعك اليمين اتجاه القبلة..... وهى بنتظرنى فى نهاية الخطوات دى بى كباية لبن لاااااااازم اشيل منها تلاتة جقمات كحد أدنى .... بعد داك هى بترجع تشيل الرملة الفيها خطواتى وتصرها فى قطعة....والكلام دا بيسموهو شيل القدم... أها بعد داك لمن انتهى من البروتوكولات دى كلمات الوداع ذاااااااتا مميزة(وداعة الالف الما بتنتلف... وداعة الله عند الرسول) طبعا هن بعتقدن انو شيل القدم دا هو البيحفظ الزول وبيجيبوا راجع تانى بالسلامة......

    أها حبوباتنا ديل برضو عندهم تعليقاتهم الخاصة جداً......نكتفى بى واااااااحد بس.... اللى هو تعليقن على الشفع الصغار لم يعملو ليهم حاجة اكبر من عمرهم...... تلقى الحبوبة بتراقب ليك فى الموقف دا بى عين فاحصة جدا وتقول ليك ( شووووووووووف يا اخوانى ودابنآآآآآدم دا).

    أما عالمهم الخاص فبنلقاهو مليء بالمفارقات الطريفة.... يعنى مثلاً بنلقى انو فى كمية من الحبوبات بسفوا صعوط..... وتلقا الحُقَّة بتاعتا (علبة نيفيا كبييييييييرة) وهن طبعاً حنكهم انو الصعوط بيشيل وجع الضرس... أها الحبوبة تلقاها تقوم من صباح الرحمن تطلِّع ليك حُقَّتا من تحت لحافا وتدردم ليها سفة قدر الليلة وبكره( عشان ضرسا ما يوجعا).

    طبعا حبوباتنا العزيزات عندهم برضو حاجاتهم البتشاءمن منها..... ومثلا اذا اتكلمنا عن أوقات الأعراس كمثال حى... بنلقى انهم ما بيخلوا أفراد العائلة كان يكسروا رقبتم يعملوا عرس فى شهر الويحيد ( دا يعنى صَفَر فى الشهور العربية) وهم طبعا اصلا بتعاملوا بالشهور العربية ... وكل شهر عربى عندهم ليهو اسم خاص بيهو.... أها الويحيد دا هن بيعتقدن بىانو لو عرستا فيهو بفترضو انك أكيد حتبَّكِر فيهو.... ولو دا حصل.... العارض بيركبك من ساسك لى راسك عمرك كلو.... وولدك الجبتو فيهو دا لازم كل سنة تَكِّرم ليهو بى ضبيحة وتوزعا على المساكين.. وأكان ما كرَّمتا بموت... وأها انتا تبقى كل سنة فى العيد ميلاد جاهز بالتورتة والخروف سوا.......وخروفك دا لازم يتربط فى البيت قبل ما تفكر تشترى للولد الهدية... وبرضو بقولوا ما فى زول يعرس بين العيدين اطلاقاً ..... لاكن(( ياكافى البلا يا حايد المحن)) و((قَبُلُم وَحَّدُم)) الناس هسى مدّورِين ليك فى الاعراس دى على الطريقة الصاح وفى كل ايام السنة.. و بقو ما بعرفوا ليك حبوبة ولا ويحيد ولا بين عيدين ولا بتيخ.....
    الحبوبات يا اخواننا علاجهم براهو ..... ادوية بلدية وأعشاب وزيت سمسم وكركدى وقرض وحلبة و....و...و...!!!!!
    وأكلم براهو ..... كسره وملاح وعصيدة ...... فطور وغدا وعشا وسحور ذاتو !!!!!
    ورقادهم براهو...... فى الحوش فى هبوب الله السمحة دى فى العنقريب اب كراب.. واللحاف والوسادة!!!!!


    وكل شى كل شى فى عالم حبوباتنا مختلف مختلف لكنه جميل جميل!!!!!......!!!!!!!

      الوقت/التاريخ الآن هو الإثنين أبريل 21, 2014 6:04 pm